కాలేజ్ రోజుల్లో....

​​

మనం కొంచెం ఫ్ల్యాష్‌బ్యాక్ లోకి వెళ్దాం. మీరు మొహం మీద రింగులు వేసుకుంటే నేను మెల్లిగా తీసుకెళ్తా....

సరేనా?..........

అది 2003 వ సంవత్సరం.... స్కూల్ లో దెబ్బలు తినే స్థాయి నుండి కళాశాలలో దెబ్బలు తినే స్థాయికి ప్రమోషన్ వచ్చిన రోజులు......

నాకు ఇంటర్మీడియేట్ లో ఉన్నన్ని అనుభవాలు గాంధీ గారికి జీవితకాలంలో ఉన్న అనుభవాల కన్నా ఎక్కువే అని ప్రగాఢ నమ్మకం. అది నిఝంగా నిజం కూడా. నేను హైదరాబాద్ కాలేజ్ లో చేరి నా విద్యా ప్రవాహాన్నీ కొనసాగిద్డాం అని ఎన్నో ప్రణాళికలు వేసుకున్న వేళ శుక్రుడు వక్రదృష్టితో చూడడం వలన అది కార్యరూపం దాల్చలేదు. అయిన సరే నేను ఈ లోకల్ కాలేజ్ లో చదివితే ఎక్కడ చెడిపోతానో అన్న భయం వల్ల నిజామాబాద్‌లోని కాలేజ్లో మా నాన్న గారు చేర్పించడం జరిగింది. కానీ అక్కడ చేరిన మొదటిరోజే ప్రిన్సిపల్ ఎవరో బడుగు బలహీన విధ్యార్థిని పట్టుకుని NTR విలన్లని బాదినట్టు బాదడం చూసి మిక్కిలి భయపడ్డాను. ఇంట్లో పెళ్ళాం మీద ఉన్న కోపాన్ని కాలేజ్లో విధ్యార్థులపై చూపిస్తాడని వేగుల సమాచారం మేరకు అక్కడే ఉంటే నా బతుకు ఇత్తడి మూకుడిలో మెత్తటి పకోడీ అవుతుందని గ్రహించి పెట్టె బేడా మూట ముల్లే సర్దుకుని పలాయనం చిత్తగించాను. అది తెల్సిన మా నాన్న మిక్కిలి కోపోద్రుక్తుడై సహస్రనామార్చన చేసి కుంకుడు కాయ పులుసు కంట్లో పోసి మరీ తలంటాడు.

ట్విట్టర్ లో అకౌంట్ లేని వాడికి ఫేస్‌బుక్క్కే దిక్కని అప్పటికీ అడ్మిషన్స్ పుణ్యకాలం కాస్త గడిచి పోవడంతో దగ్గరలోనే కాలేజ్ హాస్టల్లో చేర్పించక తప్పలేదు. అలా ఒకోనొకా దుర్ముహూర్తాన కాలేజ్ లో అడుగుపెట్టడం జరిగింది. నేను కాలేజ్ కి వెళ్ళిన మొదటి రోజే మా ప్రిన్సిపల్ కాస్త హరీ అన్నాడు. ఆ విధంగా మొదటి రోజు సెలవు లభించడంతో అట్టర్ ఫ్లాప్ ఐన సినిమా రీమేక్ రైట్స్ని భారీ రేట్ కి అమ్మిన ప్రొడ్యూసర్ లాగా తెగ ఆనందపడిపోయి కోయ డ్యాన్స్ లు గట్రా (గట్రా అంటే ఏమిటో అదేలా చేస్తారో తెలీదు) చేశాను. ఇన్ని అపశకునాల మధ్య ప్రారంభించిన నా కాలేజ్ యాత్ర ఎలా కొనసాగుతుందో వేరే చెప్పక్కర్లేదు అనుకుంటా....

నేను స్కూల్ లో ఉన్నప్పుడు అందరు టీచర్ లతో దెబ్బలు తిన్నాను కానీ ఒక లెక్కల మాస్టర్ తో మాత్రం దెబ్బలు తినలేదు ఎందుకంటే నా దృష్టిలో లెక్కల సబ్జెక్ట్ తప్ప మిగతావన్నీ అసలు సబ్జెక్ట్ లే కాదు. ఆవిధంగా ఆ రికార్డ్‌ని ఎలాగైనా కాపాడుకోవాలి ముందే కంకణం కట్టుకుని మరి కాలేజ్ లో అడుగుపెట్టాను. 

కానీ సముద్రం ఉప్పొంగింది.

అగ్నిపర్వతం బధ్ధలయ్యింది.

విధి వక్రించింది.

బాలకృష్ణ సినిమా హిట్ అయ్యింది.

అలాంటి ఎఫెక్ట్స్ బ్యాక్‌గ్రౌండ్ లో జరిగాక కొన్ని రోజుల్లోనే నాకు అర్ధం అయ్యింది ఏంటంటే మా మేథ్స్ టీచర్ కి, "విధ్యార్థులని ఎలా కొడితే బావుంటుంది" అనే దేశంలో ఉన్న అతి సంక్లిష్టమైన మరియు అతి ముఖ్యమైన విషయం మీద పరిశోధన చేసే Ph.D విధ్యార్థులకి ట్రైనింగ్ ఇవ్వడంలో 42 సంవత్సరాల అనుభవం (ఆయన వయసు 40 ఉండొచ్చు సుమారుగా) ఉంది అని.

                                                                         (ఇంకా ఉంది)