ఆటో జానీ

ధనికుడు అంటే ఎవరు? 

బాగా ధనికుడు అంటే పూణేలో రోజు ఆటోలో ఆఫీస్ కి వెళ్ళి తిరిగి ఆటోలో వచ్చేవాడు. అవును ఇది నేను ఇక్కడికి వచ్చిన ఒకే ఒక్క సంవత్సరంలో బాగా పరిశోదించి కనుక్కున్న నగ్న సత్యం. అధికారపక్షం వాళ్ళు 2*2=4 అంటే కూడా విభేదించే ప్రతిపక్షం వాళ్ళు కూడా ఏకగ్రీవంగా ఒప్పుకునే ఒకే ఒక్క ప్రతిపాదన ఇది.  

ఆటోలో కూడా చేరుకోవాల్సిన గమ్యానికి చేరుకోవాలి అంటే డబ్బులు ఒక్కటే సరిపోదు కూసింత అదృష్టం కూడా ఉండాలి. అసలు వాళ్ళను పలానా చోటుకీ వెళ్ళడానికి ఒప్పించడం కంటే తాలిబాన్లకు శాంతిసందేశం గురించి బోదించి వాళ్ళను మహాత్ములుగా మార్చడం చాలా సులభం. ఈ విషయం కూడా ఏదో నోటిమాటగా ఊరికే చెప్తున్నది కాదు ఎన్నో అనుభవాల నుండి నేర్చుకున్న గొప్ప గుణపాఠం. 

ఆటోవాల1: 

నేను: భయ్యా, lohegoan కి వస్తారా? 

ఆటో: Lohegoan లో ఎక్కడ? 

నేను: గురుద్వార్! 

ఆటో: గురుద్వార్ లో ఎక్కడ? 

నేను: గురుద్వార్ వరకు కూడా వెళ్ళవలసిన అవసరం లేదు. దానికన్నా ముందే first left తీసుకుంటే సరి! 

ఆటో: నేను రాను. 

ఆటోవాల2: 

నేను: భయ్యా, lohegoan కి వస్తారా? 

ఆటో: Lohegoan లో ఎక్కడ? 

నేను: గురుద్వార్! 

ఆటో: గురుద్వార్ లో ఎక్కడ? 

నేను: గురుద్వార్ వరకు కూడా వెళ్ళవలసిన అవసరం లేదు. దానికన్నా ముందే first left తీసుకుంటే సరి! 

ఆటో: నేను రాను. 

నేను: ఓ! గురుద్వార్ కి రారు అనుకుంట. ఇప్పుడు అడిగే వాళ్ళని lohegoan బస్స్టాండ్ వరకే అని అడగాలి. 

ఆటోవాల3: 

నేను: భయ్యా, lohegoan కి వస్తారా? 

ఆటో: Lohegoan లో ఎక్కడ? 

నేను: lohegoan బస్ స్టాండ్ వరకు వస్తే చాలు. 

ఆటో: నేను రాను 

ఆటోవాల 4: 

నేను: భయ్యా, lohegoan కి వస్తారా? 

ఆటో: Lohegoan లో ఎక్కడ? 

నేను: lohegoan బస్ స్టాండ్ వరకు వస్తే చాలు. 

ఆటో: నేను రాను 

ఆటోవాల 5: 

నేను: భయ్యా, lohegoan కి వస్తారా? 

ఆటో: Lohegoan లో ఎక్కడ? 

నేను: అసలు lohegoan కి వస్తావా? రావా? 

ఆటో: రాను 

నేను: మరెందుకు అడిగిగావ్ lohegoan లో ఎక్కడ అని? 

ఆటో: అలా అడగడం నా ప్రాథమిక హక్కు కాదనడానికి నువ్వెవర్రా! అన్నట్టు గుడ్లురిమి చూసి వెళ్ళిపోయాడు. 

అదేంటో మనం వెళ్లే ప్రాంతానికి తప్ప పాకిస్తాన్ కి అయిన సరే వచ్చేస్తా అంటారు కానీ మనం వెళ్లే ప్రాంతానికి మాత్రమే రారు. ఎందుకో మనకు తెలీదు వాళ్ళూ చెప్పరు! అసలు ఇలా కాదు ఏధైనా వేరే ప్రాంతానికి వెళ్తాం అని చెప్పి అక్కడికి రాను అంటే నేను వెళ్లాల్సిన చోటుకీ వస్తారేమో కనుక్కుందాం అని ప్రయత్నించాను. 

ఆటోవాల 6: 

నేను: భయ్యా, ఎరవాడ కి వస్తారా? 

ఆటో: వస్తాను. 

నా మొహం లో నెత్తురు చుక్క లేదు. ఎలాగోలా తప్పించుకుని వెళ్ళిపోయాను అక్కడినుండి.  

అక్కడే రోడ్ పైనే పడుకుంటే బాగోదు కాబట్టి ఎలాగైనా రూమ్ కి వెళ్ళి పడుకోవాలని ఇంకొక ఆటో దగ్గరికి వెళ్ళి, నేనే ఆటో డ్రైవ్ చేస్తా కావాలంటే నువ్వు నా మొబైల్ లో గేమ్స్ ఆడుతూ అలా కూర్చో, కావాలంటే నీ కాళ్ళు పట్టుకుంటా అని కళ్ళనీళ్ళు పెట్టుకుని బతిమాలితే ఒకతను రావడానికి ఒప్పుకున్నాడు. హమ్మయ్య మొత్తానికి ఎలాగైతేనేం సాధించాను అని సంతోషించేలోపు నెల జీతం అడిగాడు. అదేంటి కేవలం 5 కిలో మీటర్ లు మాత్రమే కదా? దానికే నెల జీతమా? అని అడిగితే ఏదో నేను కాబట్టే నెల జీతం అడిగాను ఇంకేవరైన అయ్యుంటే సంవత్సరం జీతం అడిగేవాళ్ళు అన్నాడు. తన దయార్ద హృదయానికి నా మనసు చలించి ద్రవీభవించి కళ్ళవెంబడి ధారలుగా బయటికి వచ్చింది. ఆనందంతో అప్పటికప్పుడు కోయ నృత్యం కాస్సేపు చేసి ఆటో లో ఎక్కి కూర్చున్నాను. అలా మొత్తానికి ఇంటికి చేరడం జరిగింది. 

వారాంతాలలో అయితే ఇంకా దారుణం. వాళ్ల ఆస్తి ఏదో మన పేరుమీద రాసినట్టు వాళ్ళు ఎంత అడిగితే అంత ఇవ్వాల్సిందే. మిగతా రోజుల్లో అయితే కనీసం లక్ష కి ఒక రూపాయి చొప్పున అయిన తగ్గిస్తారు కానీ వారాంతంలో మీటర్ మీద 250% ఎక్కువ ఇస్తే కానీ కదలమూ అని భీష్మించుకుని కూర్చుంటారు. నాలాంటి బడుగు బలహీన వర్గ శ్రామిక జీవులకి మీటర్ డబ్బులు కట్టాలంటేనే బాంక్‌లో పర్సనల్ లోన్ తీసుకుంటే కానీ కుదరదు. అలాంటిది మీటర్ మీద 250% అంటే EMI కి మార్చుకుని ప్రశాతంగా ఒక జీవిత కాలానికి కట్టాలి.  

ఒకానొక దురదృష్ట రోజున నా ఖర్మకాలి సినిమా చూడాలి అని దుర్బుధ్ధి పుట్టి వెళ్లాల్సి వచ్చింది. ఇంతకు ముందు లాగా సినిమా హాల్ లో వరుసలో నిలబడి టికెట్ తీసుకోవాల్సిన అవసరం లేకుండా ఆన్‌లైన్ లోనే తీసుకోవచ్చు కావున ఒకటి ముందుగానే బుక్ చేసుకుని ఆట సమయానికి ఒక గంట ముందుగా బయలుదేరడం జరిగింది. కానీ 2 కిలో మీటర్ ల దూరం నడుచుకుంటూ వెళ్ళడానికి సరిపోతుంది కానీ ఆటో లో వెళ్ళడానికి అస్సలు సరిపోదు అని ఆ రోజే తెలిసివచ్చింది.  

ఆటో వేసుకుని అంగారక గ్రహానికి రావడానికి కూడా సిద్దంగా ఉన్నారు కానీ నేను వెళ్లాల్సిన సినిమా థియేటర్ కి మాత్రం రాకూడదని మూకుమ్మడిగా నిర్ణయించుక్కున్నట్టున్నారు. ఒక అర్ధగంట సేపు చాలామందిని బతిమాలినా తర్వాత ఎడారి లో ఓయాసిస్ లాగా ఒకతను రావడానికి సిద్దమే అని ప్రకటించాడు. ఆ కరుణామయుడు దేవలోకం నుండి దిగి సరాసరి నా దగ్గరికే వచ్చినట్టు అనిపించింది. కానీ ఎన్ని నెలల జీతం అడుగుతాడో అని భయపడుతూనే ఆటో ఎక్కడం జరిగింది. ఆటో ఎక్కి ఎక్కగానే ఉన్న ముప్పై ఆరు పళ్లను నావైపు చూపించి డైరెక్ట్ నాలుగో గేర్ లో ఆటో ని ముందుకి పోనిచ్చాడు. ఆ వేగానికి ముందుకి తూలి ముందున ఉన్న ఇనుప రాడ్ కి తల తగిలి కొంచెం రక్తం వచ్చింది. స్పృహ తప్పకపోవడం మరియు నా తల కూడా పగలకపోవడంతో ఆనందంతో మూర్చపోయాను. అసలు ఆటో అంత సున్నితంగా నడుపుతాడని ఏమాత్రం తెలీని నేను ఆనందంలో గావుకేక కూడా పెట్టాను. ఏమయ్యింది అని ఆటో ఒక్కసారిగా ఆపి వెనక్కి తిరిగి చూసాడు చోదకుడు. హిహిహి ఏమీ అవ్వలేదు మనం త్వరగా సినిమా కి వెళ్ళాలి అని అన్నాను. అలాగే అని మళ్లీ ఆటో ని ముందుకు కదిలించాడు. ఈసారి కూడా సరాసరి నాలుగో గేర్ వేస్తాడని ఊహించి ముందుగానే రాడ్ ని గట్టిగా పట్టుకోవడం తో దెబ్బలు తప్పించుకున్నాను. ఇంతలో నాకొక విషయం గుర్తుకు వచ్చింది అసలు నా జీతం అడక్కుండానే ఆటో ని తీసుకెళుతున్నాడు అని. ఆ విషయమే గుర్తు చేశాను. దానికి చోదకుడు వికటాట్టహాసం నేను మీటర్ ఎంత అయితే అంతే డబ్బులు తీసుకుంటాను అని చెప్పాడు. అప్పుడు నాకు నిజంగానే దేవుడే భువీ నుండి దిగివచ్చి మరి నా మాటల ఆలకించాడేమో అని అనిపించింది. ఇక్కడ ఆటో ని మీటర్ మీద నడపడం అంటే తన ఆస్తి అంత నా పేరు మీద రాయడంలా భావించే వాళ్ళను చూశాను కానీ ఇలా నిజంగానే త్యాగం చేసే వాణ్ణి మొట్టమొదటి సారిగా చూడడంతో ఆనందంతో కళ్ళలో నీళ్ళు తిరిగాయి. తర్వాత ఆనందం తట్టుకోలేక మూర్చ పోవడం కూడా జరిగింది.  

అలా ఎంత సేపు పడి ఉన్నానో తెలీదు కానీ కాసేపయ్యాక నా మీద వర్షం పడడంతో లేచి కూర్చున్నాను. అదేంటి వర్షం పడుతుంది అనుకునే లోపు అర్ధం అయ్యింది ఏంటంటే చోదకుడే నా మీద కాసిన్ని నీళ్ళు కొట్టి లేపాడు అని. కళ్ళు నులుముకుని పక్కకు చూసి హమ్మయ్య సినిమా థియేటర్ వచ్చింది అని సంతోషపడ్డాను. అప్పుడు డబ్బులు ఇచ్చి లోపలికి వెళ్ళడానికి మీటర్ వైపు చూసి మళ్లీ కళ్ళు తిరిగి పడిపోయాను. ఇలాంటి సంఘటనలు చాలా చూసి ఉండడం వల్ల అనుకుంటా ఏ మాత్రం భయపడకుండా మొహం మీద ఒక్క గుద్దు గుద్ది లేపాడు. లేవగానే ఆగ్రహం బాధ భయం తో చోదకుడితో ఆదేమైన మీటరా? లేక మొన్న NASA అంగారకుడి మీదకు పంపిన రాకెట్ ఆ? అని అడిగాను. దానికి ఆ చోదకుడు మిక్కిలి వీరవేశంతో ఊగిపోయాడు. అసలు తాను ఈ దేశాన్ని ఎలా ఉద్దరించింది, తన వల్లనే మన దేశానికి స్వాతంత్ర్యం ఎలా వచ్చింది, తన నిజాయితీకి గాంధీ గారు ఎలా సంతోషించిది అన్ని విషయాలను కూలంకశగా వివరించాడు. చేసేది ఏమీ లేక నా ATM Card ఇచ్చి పిన్ నంబర్ తనకి చెప్పి, నాలుగు బ్లాంక్ చెక్స్ ఇచ్చి కళ్ళు తుడుచుకుంటూ వెళ్ళి, ఏడుస్తూ సినిమా చూశాను. 

సోదరసోదరీమనులారా ఇందు మూలముగా నేను చెప్పొచ్చేది ఏంటంటే ఈ ఉద్యోగాలు అన్ని వదిలేసి ఒక ఆటో కొనుక్కుని పూణే లో ఒక్క పూట తిప్పితే వచ్చే డబ్బులను బాంక్‌లో వేసుకుని వచ్చే వడ్డీతో కాలు మీద కాలేసుకుని బతికేయ్యండి అని.