నా పుత్ర రత్నం - బాహుబలి

నాన్న నాన్న మనం చానం (స్నానం) చేద్దామా?

స్నానమా? పొద్దునే చేసాము కదా బేటా?

షవర్ కింద చేద్దాం....!

షవర్ కిందనే కదా చేసింది పొద్దున?

అలా కాదు నాన్న (కోపంగా) నీకేం తెలీదు. నిన్న చూసిన సినిమా లో చేసినట్టు షవర్ కింద చేద్దాం.

బాహుబలి సినిమా లోన? అందులో షవర్ కింద ఎవరు చేశారు ఎప్పుడు చేశారు స్నానం? (కొంపదీసి తమన్నా సీన్ ఏమైన మిస్ అయ్యాన నేను?)

ప్రభాస్ చేశాడు కదా చాలా సార్లు. నువ్వు కూడా నిన్న సినిమా చూశావు కదా తెలీదా?

(బహుశా వాటర్ ఫాల్ గురించి అనుకుంట)

ఓ అదా! కానీ మన దగ్గర అంత పెద్ద షవర్ లేదు కదా! మళ్లీ ఎప్పుడైనా మనం పెద్దది కట్టుకుందాం. అప్పుడు చేద్దువు కానీ సరేనా?

సరే నాన్న! అవును నాన్నోయ్ నాకొక డౌటానుమానం

ఏంటది?

ఆయన ఎందుకు అన్ని సార్లు చానం చేశాడు? నేను చేస్తే నాకు ఆయ్ (జ్వరం) వస్తుంది అని తిడతావు కదా. మరేమో వాళ్ళమ్మ ఏమీ అనలేదు....

నిజంగా స్నానం చెయ్యలేదు ఆయన. చేద్దామని వెళ్ళి మద్యలోనే పడిపోయాడు కదా...!

మరి పడిపోయినప్పుడు దెబ్బలు తాకాలి కదా ఎందుకు తాకలేదు?

(త్వరగా విషయాన్ని పక్కకు మళ్లించకపోతే చాలా ప్రమాదం....)

అది తర్వాత చెప్తా కానీ ఇంతకీ నువ్వు అన్నం తిన్నావా? వెళ్లు వెళ్ళి తిను...

(ఇంతలో నా భార్య)

ఆడికి అన్నం వద్దు అంట! ఎంత చెప్పిన తినట్లేదు. అదేదో చేసి పెడితే కానీ తినడు అంట. అదేదో కనుక్కుని చెప్తే నేను చేసి పెడతాను.

ఏం కావాలి బెటా?

నాకు నల్ల లడ్డు కావాలి నాన్న....

నల్ల లడ్డా? అది ఎక్కడ చూశావు?

సినిమా లో గుండు అంకుల్ తింటాడు కదా. ఆ నల్ల లడ్డు నాకు కావాలి.

అది నువ్వు తినకూడదు బెటా. అది తిన్నందుకే ఆ అంకుల్ కి గుండు అయ్యింది. నువ్వు తింటే నీక్కూడా గుండు అవుతుంది మరి.

(తల మీద చెయ్యి పెట్టుకుని) వద్దు నాన్న. నల్ల లడ్డు ఏం అసలు బాగాలేదు . అందుకే గుండు అంకుల్ అది తినుకుంటూ ఏడ్చాడు.

మరి తినడానికి వెళ్లు.

అది కాదు నాన్న, ఆ పిచ్చి ఆంటీని (అనుష్క అవతారం చూసి అలా అనుకుని ఉంటాడు) కట్టేసారు కదా. ప్రభాస్ వచ్చి ఎందుకు అక్కడి నుండి ఫైటింగ్ చేసి పిచ్చి ఆంటీ ని తీసుకెళ్ళాడు?

(అసలు వీడిని ఆ సినిమా కు తీసుకెళ్ళడమే తప్పు. ఇప్పుడు స్టోరీ ఎలా చెప్పాలి చెప్తే మాత్రం ఏం అర్థం అవుతుంది)

అవన్నీ తర్వాత చెప్తా కానీ నువ్వు వెళ్ళి అన్నం తిను.

చెప్తేనే అన్నం తింట లేకపోతే నేను తినా (కోపంగా)....

(^&%#*&^$(*&$&)

పిచ్చి ఆంటీ ని హాస్పిటల్ కి తీసుకెళ్ళాడు. అక్కడే కట్టేసి ఉంటే తగ్గదు కదా మరి, అందుకే తీసుకెళ్ళాడు. (శభాష్! భలే చెప్పావ్)

 

 మరి హాస్పిటల్ కి ఆంబ్యులెన్స్ లో వెళ్ళాలి కానీ గుర్రం బండి మీద ఎందుకు వెళ్లాడు. మనం ఏధైనా జాతర కి వెళ్ళినప్పుడు మాత్రమే గుర్రం బండి ఎక్కుతాం కానీ హాస్పిటల్ కి వెళ్ళేటప్పుడు ఎప్పుడు ఎక్కలేదు కదా?

అక్కడ ఆంబ్యులెన్స్ పాడైంది అందుకే తొందరగా వెళ్ళాలి అని అక్కడ ఉన్న గుర్రం బండి మీద వెళ్లాడు.

మరి.........

(మధ్యలోనే అందుకుని)

అక్కడ గుర్రం బండి ఎందుకు ఉంది అనే కదా నీ అనుమానం?

అవును నాన్న!!

మరి దీని సమాధానం చెప్తే వెళ్ళి అన్నం తింటావు కదా???

ఆ సరే నాన్న. వెళ్ళి తింటాను...

అక్కడ పక్కనే ఏదో exhibition  జరుగుతుంది. అందుకే ఆంబ్యులెన్స్ లేదని అక్కడికి వెళ్ళి గుర్రం బండి తెచ్చుకుని, పిచ్చి ఆంటీ ని తీసుకుని హాస్పిటల్ కి వెళ్లాడు... వెళ్లు వెళ్ళి ఇక అన్నం తిను...

ఆగు నాన్న తింటాను కానీ ఇంకొక కొచ్చెన్...

అది చెప్తే తింటా అన్నావు కదా వెళ్ళి తిను (కోపంగా)

తింటా అన్నాను కానీ ఇప్పుడే తింటా అనలేదు కదా నాన్న (ఇంకా కోపంగా)

సరే అడుగు తొందరగా.... దీనికి సమాధానం చెప్పిన తర్వాత వెళ్ళి ఇప్పుడే అన్నం తినాలి ఐతేనే చెప్తాను లేదంటే చెప్పాను, సరేనా?

సరే నాన్న. ఆ తెల్ల పిల్ల (తమన్నా) ఉంది కదా. మరి ఆమె చెరువులో చేతులు పెట్టి నిద్ర పోయినప్పుడు చేపలు ఆమె చెయ్యిని తినేసాయి కదా. మళ్లీ చేతులు ఎలా వచ్చాయి?

అదా!! చేపలు నిజంగా చేతులను తినలేవు. ఊరికే అక్కడ చేతులతో ఆడుకున్నాయి.

మరి మొన్న చెరువు దగ్గర జాతరకి వెళ్ళినప్పుడు నేను అందులో ఆడుకుంటా అంటే, అందులో చేపలు ఉంటాయి మన చేతులని కాళ్ళని తినేస్తాయి అని చెప్పావు కదా?

(హే భగవాన్! ఇప్పుడు ఇంకేది చెప్పిన ఇంతకు ముందు చెప్పింది ఏదో ఒకటి తీసుకొస్తాడు. ఏదో ఒకటి చేసి తప్పుంచుకోకపోతే చాలా కష్టం)

ఇప్పుడు నువ్వు వెళ్ళి అన్నం తింటే నేను నీకు ఒక కారు బొమ్మ కొనిస్తా. ఎప్పటి నుండో కావాలి కావాలి అంటున్నావ్ కదా వెళ్లు వెళ్ళి తొందరగా తిని రా షాప్ కి వెళ్దాం.

సరే నాన్న! అన్నం తిని వస్తా ఎక్కడికి వెళ్ళకు ఇక్కడే ఉండు.

(మళ్లీ జీవితం లో వీడిని సినమా కి తీసుకెళ్లకూడదు)